O comité de Jevaso e as organizacións sindicais CIG e UXT teñen convocada unha nova xornada de folga para este domingo 30 de novembro e luns 1 de decembro co obxectivo de esixirlle á empresa o estrito cumprimento do acordo de melloras asinado para o centro de traballo de Arteixo e que abone de inmediato os conceptos retributivos que marca o convenio colectivo de referencia, así como os conceptos salariais que regula o pacto de empresa.
Esta será a segunda xornada de folga logo do paro xeral desenvolvido o pasado luns, que rexistrou un seguimento do 90% do cadro de persoal. Cifra que a as centráis sindicáis poñen moi en valor tendo en conta o empeño disuasorio exercido pola empresa en diversos comunicados a través do portal do empregado para que o persoal non secundase a folga, facendo en todos os comunicados especial fincapé no desconto salarial que supón facer folga e que unha parte importante dos traballadores e das traballadoras están contratadas a través de ETT.
A folga afectará a todo o persoal, tanto contratado directo como de ETT, e a todas as quendas laborais, dando comezo ás 22 horas do domingo 30 de novembro e prolongándose até ás 22 horas do luns 1 de decembro. Ademais, para visibilizar a súa loita, o luns ás 13:30 horas, as traballadoras e traballadores sairán en manifestación das instalación de Jevaso na Avenida do embalse e percorrerá unha parte do Polígono de Sabón.
A mercantil Jevaso conta cunha liña de confección propia, pero a maior parte da súa actividade industrial emana do traballo para outras marcas como Mango, Bimba&Lola ou Álvaro Moreno e, en menor medida, tamén para o Grupo Inditex. Nas instalación de Arteixo traballan máis de 700 persoas contratadas directas e sobre 200 de ETT.
A dirección négase a respectar os termos do pacto de empresa
A representación sindical de UXT e CIG explican que a esta segunda convocatoria chégase tras do fracaso da mediación realiza no SIMA este pasado xoves, na que foi imposíbel conseguir un acordo satisfactorio para o persoal que puxera fin ao conflito e ás mobilizacións.
Hai que subliñar que este conflito xorde pola aplicación da nova estrutura salarial e retributiva do convenio colectivo da industria téxtil e da confección para os anos 2024-2026 e que foi publicado no mes de outubro de 2025. “A maiores da obrigada aplicación da estrutura retributiva do convenio, a mercantil debe abonar tamén as melloras pactadas a nivel interno na empresa, como se fixo desde sempre, pois son melloras pactadas entre a representación legal e a dirección de Jevaso”, explican as delgadas do comité de empresa.
En dito documento, engaden, páctase de forma expresa que eses conceptos salariais non serán absorbíbeis con futuras subidas do convenio, mais a pesares diso, “a empresa unilateralmente ante a actualización das nóminas e o pago de atrasos pola publicación do novo convenio, procedeu a aplicar a absorción desas melloras para acadar as subidas do convenio”.
Esta actuación constitúe un claro recorte dos dereitos salariais que nin o comité nin o persoal van tolerar. Por iso o obxectivo desta nova xornada de folga “é exixir da dirección o estrito cumprimento e abono do convenio colectivo e dos conceptos retributivos que regula o documento de pacto de empresa”.
Neste senso, a representación sindical xa advirte que a folga do día 1 “non será a última”, senón que se convocarán “as que sexan necesarias até que a empresa asuma a súa obriga de abonar os conceptos salariais íntegros que lexitimamente corresponden o persoal”.