- As actuacións financiaríanse co remanente líquido de tesourería
O vindeiro venres terá lugar na Laracha o pleno ordinario do mes de xullo. Neste caso, o goberno local (PP) proporá a aprobación dun suplemento de crédito e un crédito extraordinario que posibilitaría incorporar aos orzamentos municipais 236.546,70 euros para executar diversas actuacións de interese xeral.
Entre esas intervencións destacan o plan de mellora e mantemento da rede viaria municipal e na de abastecemento de auga, a ampliación do parque infantil da praza O Recreo da Laracha, equipamentos para instalacións culturais e museos, actuacións de mellora en instalacións deportivas, adquisición de mobiliario urbano ou o desenvolvemento do proxecto da nova numeración das vivendas nas parroquias.
Segundo a proposta do grupo de goberno, a fonte de financiamento do suplemento de crédito e do crédito extraordinario sería o remanente líquido de tesourería para gastos xerais que proxectou a liquidación do orzamento do pasado exercicio económico.