O Comité Electoral do Partido Popular de Galicia reuniuse para aprobar as candidaturas dos concellos de máis de 20.000 habitantes, ademais das cidades de Vigo, Santiago de Compostela e Ferrol.
Estas listas electorais son, segundo a normativa da formación, as que lle corresponden ao órgano autonómico. As candidaturas das catro capitais de provincia (A Coruña, Lugo, Ourense e Pontevedra) foron aprobadas polo comité nacional, mentres as dos municipios de menos de 20.000 habitantes teñen que ter o visto e prace dos órganos provinciais.
Así, a secretaria xeral do Partido Popular de Galicia, Paula Prado, encabezou a reunión como secretaria do órgano xunto co seu presidente, Alfonso Villares.
O Comité Electoral do PPdeG aprobou, polo tanto, as candidaturas das tres devanditas cidades e dos concellos de Narón, Oleiros, Arteixo, Ames, Carballo, Culleredo, Ribeira e Cambre, da provincia da Coruña; e de Vilagarcía de Arousa, Redondela, Cangas do Morrazo, Marín, Ponteareas, A Estrada, Lalín e O Porriño, no caso da provincia de Pontevedra.
Paula Prado lembra que o PPdeG é “o único partido” que ofrece un equipo e un proxecto en todos e cada un dos concellos, “xa sexa nos máis pequenos ou nas vilas e cidades”. “Fronte a outras formacións que son incapaces de atopar a alguén disposto a dar a cara polas súas siglas, ou que teñen que recorrer a pactos de perdedores, nós temos 313 candidatos e candidatas”, engade.
Así mesmo, a número dous dos populares galegos e directora de campaña subliña que na Galicia que pensa o PP “todas as xeracións son importantes”, e por iso o partido “combina madurez e xuventude” nas candidaturas.