O impulso ao desenvolvemento rural do programa Leader financiado con fondos públicos e privados, permitiu nestes 30 anos apoiar uns 7.300 proxectos que mobilizaron máis de 930 millóns de euros, así como consolidar case 6.000 empregos e crear máis de 5.000 novos. No último período de execución (2014-2020) aprobáronse case 1.500 proxectos que contaron con máis de 71 millóns de euros en axudas públicas e mantiveron ou crearon máis de 4.200 postos de traballo. Nos bos resultados deste programa tiveron moito que ver os 24 Grupos de Desenvolvemento Rural (GDR) de Galicia. O presidente da Xunta, Alfonso Rueda, participou este luns no acto conmemorativo do 30 aniversario deste Programa Leader e subliñou que o impulso do desenvolvemento rural é unha prioridade, con compromisos firmes como a Lei de recuperación da terra agraria, estratexias sectoriais para sectores clave como as do leite, o viño ou a carne, co Plan Forestal de Galicia ou coa futura Lei de calidade alimentaria. “Entre todos -asegurou Alfonso Rueda- estamos a construír un rural de futuro”.
