O parlamentario socialista Martín Seco acusou ao goberno galego de “deixar morrer” a homologación do Camiño dos Faros, que percorre 9 concellos da Costa da Morte e Bergantiños e que mobiliza ata 20.000 visitas anuais. Criticou que a Xunta teña paralizada esta homologación dende hai máis de 3 anos, que mesmo respaldaran aprobando unha iniciativa parlamentaria en 2020.
O responsable socialista lamenta que o goberno galego prefira deixar esmorecer a iniciativa para “modificala ao seu antollo de costas á asociación do Camiño dos Faros e aos concellos implicados, deixando de lado a posta en valor do alto interese natural, patrimonial e paisaxístico das comarcas en favor do “mero uso economicista dalgún amigo do goberno galego”.
Alertou que mentres miran para outro lado e manteñen paralizada a homologación da ruta, “perdemos oportunidades, e mentres outros lugares e outras rutas xogan na champions league do sendeirismo, a Xunta prefire xogar en Segunda División”. Así o dixo antes de sinalar que a día de hoxe “nin tan sequera se puxeron en contacto cos alcaldes afectados para ver como comezar a facer as reunións da mesa de implicados para conseguir a homologación”.
Seco reclamoulle ao goberno galego que cumpra co acordo parlamentario aprobado en decembro de 2020 para desbloquear a dita homologación. Daquela, a Cámara autonómica reclamáballe á Xunta de Galicia a constitución dunha Mesa de traballo integrada polo Executivo, a Deputación, os alcaldes dos 9 concellos, a asociación de turismo Costa da Morte, a Asociación Camiño dos Faros e a Federación Galega de Montañismo”.
Seco desafiou á secretaria xeral de Turismo que “lle diga a verdade aos cidadáns dende Malpica ata Fisterra, dígalles que a Xunta de Galicia quere vulnerar unha iniciativa de éxito mundial para diluíla nun proxecto xeral por toda Galicia poñendo en risco o futuro desta ruta”, concluíu.