A candidata número 1 da lista do PSdeG-PSOE ás eleccións autonómicas na provincia da Coruña, Patricia Iglesias, visitou este martes Camariñas acompañada polos candidatos Aitor Bouza e Fabián Canosa e a alcaldesa da vila, Sandra Insua, para expoñer as propostas da formación para o sector marisqueiro.
“O sector só pide axudas económicas directas, poder traballar nas praias, rexeneralas e poder sementar”, destacou na súa intervención Patricia Iglesias, quen tamén recolle a demanda de que se realice un estudo na Ría de Camariñas para investigar as causas da perda do marisco, que lle trasladarán á Xunta de Galicia.
A tamén letrada maior do Consello de Contas trasladou o “apoio e preocupación” do PSdeG pola “inactividade” do marisqueo na Ría de Camariñas, que se traduce “en que máis de cen familias se están a afogar economicamente” despois do “descenso repentino das capturas e dos ingresos” nos últimos cinco anos.
Pola súa banda, o candidato número 4 da lista do PSdeG-PSOE, Aitor Bouza, fixo referencia ó sucedido no pleno de Camariñas este luns 29 de xaneiro, onde o PP, “lonxe de defender” ó sector marisqueiro camariñán, “votou en contra da moción socialista que pretendía dar impulso e apoiar os intereses da veciñanza da vila”. “o que non imos a facer nunca é o que está a facer o PP, dicir unha cousa para venderlla ós veciños e facer a contraria”, matizou.
Como exemplo desta práctica referiuse a unha das concelleiras do PPdeG en Camariñas, Paula Mouzo, quen “foi deputada no Parlamento de Galicia e, lonxe de defender os intereses desta vila, o que fixo foi defender os intereses do PPdeG e do señor Rueda”, concluíu.