A parlamentaria socialista Patricia Iglesias lamenta a “contradición” do Partido Popular ao presentarse en Galicia como defensor do sector pesqueiro mentres en Bruxelas apoiou a aprobación do Regulamento de Control da Pesca, unha norma comunitaria que agora critica publicamente no territorio galego.
Os socialistas responden así ás declaracións realizadas polo PP en Muxía, onde asegurou estar “do lado da xente do mar” e acusou ao PSOE de incoherencia, ao tempo que se autodefiniu como “o partido da pesca”. “Non se pode dicir unha cousa aquí e facer a contraria en Europa, especialmente cando falamos dun sector estratéxico para Galicia e para a economía da costa”, sinala Iglesias.
Dende o PSdeG-PSOE Provincial da Coruña lembran que os eurodeputados do Partido Popular apoiaron a norma comunitaria e que, ademais, representantes do PP no Parlamento Europeo veñen defendendo publicamente o acordo alcanzado. Neste sentido, o eurodeputado popular Francisco Millán Mon afirmou que “en xeral, o acordo é equilibrado, realista e gradual”, e sinalou que, aínda que algúns aspectos “non nos satisfacen plenamente”, o texto final “é moito mellor que o aprobado polo Parlamento Europeo en 2021 e que a proposta da Comisión”, engadindo que “grazas ao intenso traballo do meu grupo logramos evitar medidas desmesuradas”.
A parlamentaria socialista considera que estas afirmacións evidencian que o PP avala en Europa decisións que despois cuestiona en Galicia, e pide rigor e responsabilidade nun asunto que afecta directamente á actividade diaria da frota e ao conxunto da economía do mar.
Neste contexto, dende o grupo advirten de que o debate sobre o futuro do sector pesqueiro e do rural galego debe abordarse tamén no marco das decisións europeas sobre financiamento. Neste sentido, sinalan que a proposta da Comisión Europea para o próximo Marco Financeiro Plurianual e o deseño da PAC para o período 2028-2035 supoñen un cambio de modelo que pode debilitar de facto as políticas comúns que sosteñen o sector primario e comprometer o equilibrio do mercado único.
Por último, alertan de que a integración de instrumentos clave nun fondo único, coa pretensión de cubrir agricultura, pesca, cohesión e desenvolvemento territorial con menos recursos, abre un escenario de incerteza e de perda de capacidade real de apoio ás zonas rurais e costeiras. Engaden que o recorte previsto supera o 20% no conxunto dos fondos destinados á agricultura e á pesca, ao pasar dun marco actual de 378.000 millóns de euros a unha proposta de 302.000 millóns para o seguinte período, unha redución que pode poñer en risco a seguridade alimentaria e a sustentabilidade económica e social de moitos territorios.