- Os socialistas presentarán un documento para negociar con Pablo Iglesias
Este luns a dirección do PSOE aprobou por unanimidade apoiar a proposta do seu secretario xeral, Pedro Sánchez, de formar un «Goberno monocolor».
Os socialistas presentarán a Unidas Podemos un documento cuxa base é o programa electoral co que se presentaron ás eleccións xerais, segundo explicou a presidenta do PSOE, Cristina Narbona. Con estas propostas o Partido Socialista desexa lograr un acordo co partido de Pablo Iglesias, aínda que sen a participación do mesmo no Executivo.
A executiva socialista dará luz verde á creación dun grupo de negociación con Unidas Podemos encabezado pola vicesecretaria do PSOE, Adriana Lastra, e no que participarán a ministra de Facenda en funcións, María Jesús Montero, a responsable de Educación, Mari Luz Seijo, e o secretario de Acción Electoral dos socialistas, Paco Salazar.
O PSOE mantén que eliminará «os aspectos máis lesivos» da reforma laboral e reitera o compromiso dun novo Estatuto dos Traballadores. Pola súa banda, Podemos esixe a derrogación das dúas últimas reformas laborais, aprobadas polos Executivos de José Luis Rodríguez Zapatero e de Mariano Rajoy, e insiste en blindar na Constitución a sustentabilidade do sistema nacional público de pensións.