O Rei Xoán Carlos afirmou este sábado que a operación dun triplo «bypass» aortocoronario foi coma se lle «pasara un camión por enriba», pero agora atópase «fenomenal» con «tubaxes e canos novos». Don Xoán Carlos recibiu a alta hospitalaria tras permanecer oito días hospitalizado no centro Quirón Saúde Madrid de Pozuelo de Alarcón.
Lucía Alonso, foi a encargada de ler o parte médico do ex xefe do Estado. «Atópase clinicamente estable, afrebril e coas feridas cirúrxicas en proceso de cicatrización. A exploración cardiológica mostra contractilidade e ritmo cardíaco normais», sinalou. Agora, o monarca terá que realizar revisións periódicas a cargo dos servizos de Cirurxía Cardíaca do doutor Alberto Forteza Gil e de Cardioloxía do doutor Cabrera. Don Xoán Carlos, de 81 anos, foi operado o pasado sábado 24 de agosto no citado hospital. Abandonou a Unidade de Coidados Intensivos (UCI) o pasado martes 27 para pasar a planta. A intervención foi realizada por Forteza Gil, xefe do Servizo de Cirurxía Cardíaca do centro hospitalario, e polo seu equipo.