Non hai acordo no sector do metal da provincia de Lugo, que está desde este mércores en folga para pedir un novo convenio colectivo. 7.000 traballadores estaban chamados a secundar o paro en toda a provincia.
Os sindicatos aseguran que o seguimento da folga convocada no sector do metal está a ser “masivo” na provincia de Lugo, en xeral, e de forma concreta na capital lucense, onde un amplo piquete informativo moveuse entre os polígonos de O Ceao e As Gándaras.
En declaracións, o responsable de Industria da CIG en Lugo, Alfonso Losada, informou de que “a resposta dos traballadores” a esta convocatoria “foi moi boa”, de modo que “pode dicirse que o seguimento da folga está a ser masivo”.
Segundo Losada, “está practicamente todo pechado”. De feito, aqueles negocios que ao principio “se mostraron algo máis remolóns”, a media mañá xa pecharan, sen que houbese que lamentar “ningún tipo de incidente”.
As negociacións están enquistadas pola reivindicación de subas salariais segundo o IPC e incluído o pagamento íntegro dos atrasos correspondentes do ano pasado. Este mes están convocadas outras dúas xornadas de folga: os días 23 e 25.