O Sergas comezará esta próxima semana a citar aos maiores de 80 anos, incluídos os grandes dependentes, para que reciban a primeira dose da vacina a partir do luns 22 de febreiro. Segundo explicou o xerente do Sergas, un sorteo decidirá a letra pola que comezarán as citacións. Un equipo específico estará dedicado en exclusiva a citar aos maiores. Recibirán como mínimo dúas chamadas, unha será para comunicarlles día, hora e lugar da vacinación e outra 24 horas antes para lembrárllelo. E se a familia ten dúbidas tamén poderá chamar ao teléfono do que recibiu a cita. Sanidade prepara un rexistro dos maiores de 80 anos con problemas de mobilidade para vacinalos nos seus domicilios. Segundo as autoridades sanitarias, este colectivo podería quedar inmunizado a finais de abril ou principios de maio, dependendo da chegada de vacinas.