O xuíz do Tribunal Supremo Pablo Llarena deixou sen efecto a orde de detención nacional de Carles Puigdemont tras coñecer este martes a decisión do Tribunal Constitucional de avalar a amnistía para os condenados por malversación no procés. No seu auto, Llarena deixa «sen efecto, con carácter inmediato e ata nova resolución xudicial expresa», as ordes nacionais de busca e captura e detención do expresidente catalán e dos exconsellers Antoni Comin e Lluis Puig. A decisión adóptase tras facerse pública polo Tribunal Constitucional a estimación do recurso de amparo da exconsellera Dolors Bassa fronte á resolución que denegou a aplicación da amnistía ao delito de malversación polo que foi condenada.
Carles Puigdemont, asegurou que o aval do Tribunal Constitucional á lei de amnistía «non soluciona nada» en termos da relación entre España e Cataluña. «É un conflito histórico que corresponde resolver á política e non aos xuíces», engadiu. Carles Puigdemont asegurou tamén que o aval do Tribunal de Garantías á lei de amnistía, incluíndo os delitos de malversación, «derrota a estratexia dos diversos poderes públicos españois que impediron e demoraron» a súa aplicación «por razóns estritamente políticas». Carles Puigdemont fixo estas declaración nunha comparecencia sen preguntas desde a localidade belga de Waterloo.