O Tribunal Europeo de Dereitos Humanos (TEDH) examinará a sentenza aos nove condenados polo ‘procés’ pola que se lles impuxo penas de ata 13 anos de prisión e inhabilitación por delitos de sedición e malversación e deu a España prazo ata o 12 de xaneiro para presentar alegacións.
Segundo informaron fontes xurídicas, o TEDH acordou revisar as demandas por vulneración de dereitos fundamentais que presentaron os exconsellers Oriol Junqueras, Josep Rull, Jordi Turull, Joaquim Forn, Raül Romeva e Dolors Bassa, así como a expresidenta do Parlament Carme Forcadell e os exdirigentes da ANC e Òmnium Cultural Jordi Sànchez e Jordi Cuixart.
Na resolución do TEDH consta que os condenados alegaron que viron vulnerado -entre outros- o artigo 7 do Convenio Europeo de Dereitos Humanos que fixa que «ninguén poderá ser condenado por unha acción ou unha omisión que, no momento en que fose cometida, non constitúa unha infracción segundo o dereito nacional ou internacional» e que contempla que tampouco poderá ser imposta «unha pena máis grave que a aplicable no momento en que a infracción fose cometida».