O recoñecido xornalista Fernando Ónega será o encargado de clausurar a sesión matutina do IV Congreso Nacional de Interim Management que terá lugar o próximo 17 de marzo no Palacio de Congresos de Santiago de Compostela. Tras os diversos relatorios e mesas redondas e antes de clausura oficial do evento, o actual presidente do Comité Editorial do diario dixital 65ymas.com abordará un tema clave para o sector empresarial e para a sociedade actual.
As proxeccións do Instituto Nacional de Estatística (INE) indican que dentro de 10 anos haberá en España 49 millóns de habitantes. E un de cada catro terá 65 anos ou máis. Unha poboación moi envellecida que supón un reto para o sistema. Pero tamén unha gran oportunidade que pasa polo que se denominou o «talento senior».
O notable incremento da esperanza de vida permitiu que vivamos máis anos en mellores condicións, e isto cambia as regras de xogo. «Un asunto que me parece apaixonante», indica Fernando Ónega e que é, na súa opinión, xunto á xeopolítica e o cambio climático, unha das maiores revolucións mundiais. De aí a súa implicación no diario 65ymas.com que aborda, precisamente, os desafíos que carrexa o envellecemento da sociedade.
Fernando Ónega será presentado polo coñecido xornalista Terio Carrera quen conducirá todo o evento, no que tamén confirmaron xa a súa participación o exministro de Xustiza e socio de Marca Franca, Francisco Caamaño; o presidente da Confederación de Empresarios de Galicia, Juan Manuel Vieites, ou Fernando Vázquez, socio de Deloitte Legal.
As persoas interesadas en asistir poden inscribirse na web https://www.eventbrite.es/e/entradas-iv-congreso-nacional-aime-442411262997.
O relator
Fernando Ónega (Lugo, 1947) é unha das voces máis autorizadas do xornalismo español. Director de prensa da Presidencia do Goberno con Adolfo Suárez, foi o creador dun dos símbolos da Transición. As palabras «Podo prometer e prometo…», pronunciadas por Adolfo Suárez en Televisión Española nos días previos ás eleccións democráticas de 1977.
Analista político cunha enorme traxectoria en medios de comunicación, foi colaborador e columnista tanto en medios escritos como en radio e televisión, ademais de autor de varios libros. Comezou a súa andaina en TVE onde a finais dos anos setenta dirixiu o programa informativo Sete días. En 1980 foi nomeado director de Relacións Externas da cadea. Dirixiu os espazos informativos de Telecinco e Antena 3 e director de Onda Cero, cadea á que estivo ligado tres décadas. Na actualidade mantén a súa colaboración con varios xornais e preside o Comité Editorial de 65ymas.com, un diario dixital dirixido a persoas da terceira idade, que aborda desafíos que carrexa o envellecemento da sociedade.