A operación de hernia abdominal á que foi sometido o papa Francisco terminou sen complicacións, confirmou este mércores o Vaticano.
«A intervención cirúrxica terminou. Desenvolveuse sen complicacións e durou tres horas», explica un conciso comunicado da Santa Sede.
O pontífice de 86 anos deberá permanecer algúns días ingresado, e a Prefectura da Casa Pontificia cancelou todas as actividades do papa ata o próximo 18 de xuño.
Esta cirurxía decidiuse tras un último recoñecemento que tivo lugar o martes. O estado de saúde do Pontífice estivo recentemente no centro das noticias tras a súa última hospitalización en marzo por problemas respiratorios.