A Xunta de Galicia deu este venres o visto e prace a «unha adaptación do uso obrigatorio de máscaras en todo momento», de modo que os cidadáns deberán usar este elemento de protección «tanto en espazos ao aire libre como pechados, sempre que poidan concorrer outras persoas e aínda que se garde a distancia de 1,5 metros».
Así o anunciou o presidente da Xunta en funcións, Alberto Núñez Feijóo, que indicou que é preciso «dar un paso máis», xa que se está vendo en toda España que a situación é «de máximo risco» e lembrou que o pasado 25 de xuño Galicia foi «a primeira comunidade» en recomendar usar máscaras de forma preferente.
A norma terá excepcións, de modo que non terán que usar a máscara obrigatoriamente, tanto en espazos abertos como pechados, as persoas con riscos respiratorios nin as persoas que convivan; tampouco será obrigatorio o seu uso en praias e piscinas durante o momento do baño ou mentres non se estean desprazando, nin nos locais de hostalería mentres se consuma nin tampouco cando se faga exercicio ao aire libre de modo individual.