- En ningún caso poderá haber máis de dúas persoas na leira, as cales deberán respectar en todo momento as distancias de seguridade
O Diario Oficial de Galicia (DOG) publicou este martes a ORDE do 23 de marzo de 2020 pola que adoptan medidas de carácter obrigatorio en relación co COVID-19 en cumprimento do Acordo do Centro de Coordinación Operativa da emerxencia sanitaria na Comunidade Autónoma de Galicia (Cecop), do 18 de marzo de 2020, sobre a venda directa de produtos agrogandeiros nos mercados, a venda de produtos vexetais para a plantación en hortas de consumidores finais e o desprazamento de agricultores e viticultores para os efectos da realización de actividades agrarias.
No documento establécense unha serie de normas e medidas a ter en conta polos profesionais do mundo agrario ou relacionado co mesmo.
En primeiro lugar, mantense a prohibición ata o 31 de marzo da realización dos mercados tradicionais que teñen lugar nos concellos de Galicia con venda directa de produtos agrícolas e gandeiros. Iso si, fomentarase a venda de produtos agrícolas e gandeiros por medios alternativos que non impliquen presenza física, como por vía telefónica, con realización de pedidos a través da rede en liña (correo electrónico), ou similares, servidos polo produtor no domicilio do consumidor, e que eviten o desprazamento de persoas pola vía pública.
En segundo lugar, as persoas agricultoras e viticulturas e os seus traballadores poderán efectuar os desprazamentos para a realización dos traballos necesarios de atención e mantemento dos cultivos; e terá a consideración de agricultor/a profesional quen estea dado/a de alta no Rexistro de Explotacións Agrarias de Galicia (Reaga).
Ademais, as persoas que teñan cultivos de autoconsumo, é dicir, con fins non comerciais, poderán realizar os desprazamentos mínimos e imprescindibles para o mantemento e atención de ditos cultivos, sempre que o desprazamento non supere unha distancia superior a 500 metros da súa vivenda habitual. En ningún caso poderá haber máis de dúas persoas na leira, as cales deberán respectar en todo momento as distancias de seguridade e demais protocolos de prevención establecidos pola autoridade sanitaria.
En relación coa acreditación da necesidade de desprazamento, nas actividades agrarias consideradas de autoconsumo poderá realizarse coa presentación do carné de aplicador/manipulador de produtos fitosanitarios.