- Serán contratados 30 socorristas acuáticos para prestar servizos nas praias de Carballo, pero cabe lembrar que aínda que faga bo tempo, de momento non están operativos.
As concellarías de Praias, Obras e Servizos e Seguridade de Carballo están a traballar coordinadamente para poder desfrutar das praias municipais nas mellores condicións e con total seguridade. Esta semana arrincaron os traballos de acondicionamento das zonas verdes e tamén se publicaron as bases para a selección de 30 socorristas co obxectivo de iniciar a temporada oficial a mediados de xuño.
Estamos nun momento “de transición”, como apunta o coordinador de Protección Civil, Javier Souto Facal, que insiste ademais na perigosidade das nosas praias e na necesidade, por tanto, de extremar as precaucións tamén á hora do baño. Este verán poderás desfrutar do litoral ao completo, xa que a clasificación sanitaria das augas de baño é boa en Arnados e excelente en Pedra do Sal, Razo, Ría de Baldaio e Saíñas.