Os concellos da provincia da Coruña teñen ata o día 5 de febreiro para presentar os proxectos nos que queren investir os fondos que a Deputación destina este ano aos municipios coruñeses na primeira achega do Plan Único (POS+2021).
O presidente do ente provincial, Valentín González Formoso, lembrou que o Plan Único incrementa este ano o seu orzamento inicial un 37%, pasando dos 47,2 millóns de 2020 aos 64,6 millóns de euros de orzamento inicial este ano, co obxectivo de impulsar a reactivación social e económica nos municipios da provincia.
Subliñou ademais que o Plan Único presenta importantes novidades, como os 14 millóns de euros do POS Social incluidos no orzamento, que serán destinados en exclusiva a financiar o aumento dos gasto social dos concellos debido á pandemia da Covid-19. Reforzo do persoal adscrito aos servizos sociais e axuda no fogar, creación de axudas para a cobertura de necesidades básicas coma vivenda, alimentación, gastos médicos e farmacéuticos ou escolarización dos colectivos máis vulnerables son algunhas das cuestións ás que os concellos poden destinar estes fondos.
As achegas destinadas aos concellos das comarcas da Coruña e As Mariñas oscilan entre os 270.052 que percibirá Coirós e os 1.536.276 de Arteixo. En total, a achega inicial do POS+2021 distribuirá máis de 13,3 millóns de euros entre os municipios da área, dos que preto de 3 millóns destinaranse a gastos sociais e máis de 10 a financiar gasto corrente, obras e investimentos ou amortización de débeda, en función das necesidades concretas de cada municipio.