Os letrados do Congreso dan luz verde á tramitación da lei de Amnistía

Co novo secretario xeral Fernando Galindo á fronte, os letrados móstranse a favor de tramitar a proposición de lei de Amnistía porque non supón un indulto xeral como a iniciativa que foi rexeitada pola Mesa do Congreso en 2021 e deixan en mans do Tribunal Constitucional un posible recurso á lei. Así o sinala no informe que preparou a Secretaría Xeral do Congreso para que a Mesa tome unha decisión sobre a cualificación do texto. O letrado maior detalla no documento que a iniciativa non entra en contradición «evidente e manifesta» co artigo 62, letra i da Constitución que impide «autorizar indultos xerais», o que ao seu xuízo si ocorría na amnistía que presentaron os independentistas en 2021. Ademais, os letrados inciden en que a admisión a trámite das iniciativas parlamentarias que chegan á Mesa non debe exercerse como unha función de «control previo de constitucionalidade» e avogan por que todas sexan admitidas e debatidas a condición de que cumpran cos requisitos e criterios necesarios.