Dirixentes políticos e sindicais, entidades empresariais da vila e asociacións de pais de colexios sumáronse á iniciativa pola que o colectivo de transportistas da central térmica de Endesa nas Pontes iniciou un bloqueo «indefinido» do acceso ao complexo, segundo confirmou o seu presidente, Manuel Bouza. A medida de presión comezou como acción sorpresa ante o anuncio de peche das instalacións en xuño. Manuel Bouza apuntou que os concentrados carecen de «data para levantar a protesta» e mostrouse disposto a «seguir cortando os accesos ata que senten cos afectados» as partes implicadas.