A Asociación Galega de Xerencia de Centros Comerciais Abertos e Zonas Comerciais Urbanas, ven de trasladar á Consellería de Economía, Emprego e Industria “unha mensaxe de apoio nestes momentos tan complexos para todos/as así como o noso convencemento de que desde a unidade, comerciantes e Administracións, venceremos ao Covid-19 e sairemos adiante reforzados e máis unidos ca nunca”
A entidade de ámbito autonómico está formada por máis de 40 xerencias dos Centros Comerciais Abertos e nestes momento representan a máis de 5.000 establecementos comerciais. As xerencias, actúan como dinamizadoras do comercio local e implementan as políticas de axudas en materia comercial promovidas pola administración xa que todas forman parte da REDIC, un instrumento mediante o cal, a Xunta de Galicia, está impulsando o proceso de modernización e ordenación do comercio local.
A asociación consciente das necesidades de apoio e acompañamento que xurdirán para o comercio de proximidade unha vez que finalice o Estado de Alarma, quere “poñer todas as unidades xerencias dos CCA, directivas e demais persoal técnico, así como toda a nosa experiencia e vontade de traballo a disposición da Consellería de Economía, Emprego e Industria en xeral e da Dirección Xeral de Comercio en particular co fin de dar resposta as inquedanzas e suxestións do tecido comercial das nosas vilas e axudar na toma de decisións para o sector que redunden nun mellor aproveitamento dos recursos públicos na ardua labor de saír desta crise canto antes e o mais reforzados posibles”.