Otegi recoñece a dor das vítimas de ETA

O coordinador xeral de EH Bildu, Arnaldo Otegi, e o secretario xeral de Sortu, Arkaitz Rodríguez, mostraron este luns o seu «pesar e dor polo sufrimento padecido» polas vítimas de ETA, que «nunca debeu producirse». «Queremos trasladarlles o noso pesar e dor polo sufrimento padecido. Sentimos a súa dor e desde ese sentimento sincero afirmamos que o mesmo nunca debeu producirse, a ninguén pode satisfacer que todo aquilo sucedese, nin que se prolongase tanto no tempo». Otegi, encargado de ler a declaración en castelán, resaltou que, «desgraciadamente, o pasado non ten remedio», e apuntou que «nada do que digamos pode desfacer o dano causado».