O vicepresidente económico e conselleiro de Economía, Empresa e Innovación, Francisco Conde, entregou o diploma de certificación do selo Galicia Calidade á cooperativa láctea Bico de Xeado. Un recoñecemento, tal e como sinalou, ao espírito innovador da compañía e á súa contribución á xeración de emprego e riqueza desde o rural e a través duns xeados 100% artesanais elaborados con materias primas de excelente calidade.
Durante unha visita polas instalacións da empresa no polígono de Bergondo (A Coruña), Conde quixo destacar a Bico de Xeado como un claro exemplo dos novos proxectos de emprendemento que están nacendo no sector agroalimentario galego vinculados á innovación e a sustentabilidade. Creada no 2012, a marca conta xa cunha vintena de postos de venda repartidos por toda España e unha gama de produto de preto de 30 sabores distintos.
Con Bico de Xeado xa son máis de 140 as empresas galegas que contan na actualidade co selo de Galicia Calidade, unha distinción que busca impulsar a competitividade e achegar confianza e seguridade aos consumidores.