O líder do PSOE, Pedro Sánchez, foi investido presidente do Goberno este xoves en primeira votación e por maioría absoluta grazas aos 179 votos de PSOE, Sumar, ERC, Junts, EH Bildu, PNV, BNG e CC, que configuran un novo bloque de investidura no Congreso dos deputados. PP, Vox e UPN votaron en contra da investidura de Sánchez, que non gañou as eleccións do 23J, pero foi capaz de fraguar unha maioría parlamentaria.
Sánchez, que de novo sae do Congreso camiño da Moncloa na súa segunda investidura exitosa, insistiu este xoves en reivindicar a lexitimidade da súa investidura e recalcou que, da mesma, sairá un goberno “lexítimo, democrático e constitucional”, polo que chamou ao PP a admitir a súa “derrota” o pasado 23 de xullo. Encomiou a “valentía” dos deputados socialistas: “Sei o difícil que resulta soportar as sinalizacións, as ameazas”.
Agora toca formar Goberno de coalición con Sumar e nos próximos días coñeceranse os nomes e apelidos dos que acompañarán a Sánchez no Consello de Ministros.