Perece un can e seis persoas resultan feridas tras unha colisión múltiple nas Pontes

Ambulancia medicalizada

Seis persoas tiveron que ser trasladadas polo equipo sanitario de urxencia este domingo como consecuencia dunha colisión entre tres coches no cruce entre a AC-564 e a AC-142, ao seu paso polo concello coruñés das Pontes de García Rodríguez.

Segundo a información facilitada polos Bombeiros do Eume aos xestores do 112 Galicia, dous condutores de distintos vehículos e outros catro ocupantes dun terceiro turismo, entre eles dous menores, resultaron feridos. Ademais, a raíz do accidente, un can, que se atopaba no interior dun dos coches no momento do choque, pereceu.

Unha persoa particular deu a voz de alarma que permitiu a mobilización dos equipos de emerxencia por parte do 112.

Así, para prestar auxilio aos ocupantes dos turismos e restablecer as condicións de seguridade na vía, desde o Centro Integrado de Atención ás Emerxencias de Galicia solicitouse a intervención dos profesionais sanitarios, dos Bombeiros do Eume, dos axentes da Garda Civil de Tráfico e da Policía Local.

Cómpre indicar que a colaboración do persoal de mantemento da Axencia Galega de Infraestruturas foi fundamental para coordinar a retirada dos vehículos sinistrados, así como para realizar as tarefas de limpeza da estrada.