As direccións dos centros asistenciais da Rede de Tratamento de Condutas Adictivas de Galicia fan pública a súa preocupación polo que cualifican de «progresiva marxinación coa que o Goberno Galego trata a este tipo de dispositivos sanitarios» onde se atenden anualmente a máis de 13.000 persoas con adiccións, na súa maioría usuarias de drogas.
Na actualidade, só o 33% do persoal destes centros completou o proceso de vacinación, mentres o 37% recibiu unha soa dose da vacina de Astra Zeneca e o 30% restante permanece sen iniciar a súa vacinación.
A desconformidade con esta xestión do proceso de vacinación nos centros de adiccións súmase a un malestar máis xeneralizado «polo grao de desatención e deterioración ao que a Administración Sanitaria galega leva sometendo, especialmente durante os últimos 10 anos, a esta estrutura asistencial altamente especializada» que, desde a súa creación, prestou un servizo irreemplazable a máis de 70.000 familias galegas.
Ademais, afirman que «a actual Administración Sanitaria mantén paralizado desde 2009 o proxecto de integración desta rede asistencial, obrigando a concellos e ONG a manter a xestión duns recursos sanitarios que son de competencia exclusiva do Servizo Galego de Saúde». Nestas circunstancias, os profesionais reivindican a urxente necesidade de elaborar un plan de atención aos trastornos adictivos, dentro do ámbito da asistencia especializada e enmarcado nas estratexias de saúde mental, que solucione dunha vez por todas a normalización da asistencia sanitaria a esta complexa patoloxía.