- Esta proba está enmarcada no Circuíto Galego de Dúatlon Cros
A Casa da Cultura de Vimianzo acolleu este mércores a gala de presentación do XIII Dúatlon de Reis, enmarcado no Circuíto Galego de Dúatlon Cros. A proba vimiancesa celebrarase o 9 de xaneiro e contará coas categorías absoluta, cadete, xuvenil e junior. Polo de agora hai 213 inscritos.
O circuíto foi presentado nun evento conducido polo xornalista Terio Carrera e no que participaron a alcaldesa do municipio, Mónica Rodríguez, o concelleiro de Deportes, Mario Andújar, e representantes da Federación Galega de Tríatlon e Pentatlón Moderno como o seu presidente, Gonzalo Mario Triunfo Delgado; o responsable do Comité Deportivo, Pablo Cabanelas; o delegado provincial, Armando Guerrero; e a secretaria, Mónica Flores.
A principal novidade deste ano é que o Dúatlon de Reis contará, por primeira vez na súa historia, cun circuíto xuvenil e as categorías de cadete, xuvenil e junio que «están a ter unha moi boa acollida», afirmou a rexedora.
Tamén estiveron presentes na gala os representantes do III Dúatlon das Letras de Baio, do VI Dúatlon Cros Lousame e do III Dúatlon Cros Cerdedo – Cotobade, que conforman xunto coa proba de Vimianzo o circuíto galego de dúatlon. Así mesmo, participaron no acto os gañadores da pasada edición da proba de Reis de Vimianzo e campións galegos do 2021, Gabriel Castiñeira e Mar Delgado, e o campión do circuíto galego, Marcos Mayo. O toque musical do evento púxoo Irma Macías, vocalista do grupo Luar na Lubre.
Percorrido do Dúatlon de Reis
O XIII Dúatlon de Reis terá a súa saída no lugar de Castromil, na parroquia de Salto. Percorrerá camiños forestais cara Tines e despois volverá ao punto de partida. A proba constará de tres itinerarios diferentes: o primeiro será a pé e levarase a cabo ao longo de 5,4 quilómetros, o segundo en bicicleta (21 km) e o terceiro será de novo a pé ao longo de 3,6 km.
A saída do circuíto da categoría absoluta terá lugar ás 11:30 horas, mentres que o mozo sairá ás 09:30 horas e contará con distancias máis curtas.
Récord de participación feminina
As inscricións a esta proba poderán realizarse ata o 3 de xaneiro a través da páxina web da Federación Galega de Tríatlon e Pentatlón Moderno. Este mércores rexistrábanse un total de 213 inscricións e, á espera de que se apunten máis persoas, este ano o o circuíto bate récords de participación feminina cun total de 49 mulleres inscritas.