- O evento terá lugar os días 2 e 3 de outubro en varias zonas da provincia da Coruña, e contará coa participación de 85 automóbiles
A praza coruñesa de María Pita foi testigo este martes da presentación oficial da sexta edición do Rally Rías Altas de Vehículos Históricos, que terá lugar os días 2 e 3 de outubro na provincia da Coruña e contará coa participación de 85 automóbiles. Ao acto de presentación acudiron a concelleira de Deportes da Coruña, Mónica Martínez; o seu homólogo en Betanzos, Andrés Hermida; o presidente do comité organizador e representante da Escudería Coruña, Ernesto Rumbo Queijeiro; e o membro do comité organizador e presidente da Escudería Ferrol, Germán Castrillón Permuy.
«En tempo de cancelacións deportivas, resulta esperanzador poder dar o pistoletazo de saída a esta proba», destacou Martínez, quen ademais asegurou que desde a administración local traballan para dar apoio a proxectos similares, pois este tipo de probas deportivas de interese «supoñen un grande impacto na nosa economía».
A proba, que será puntuable para o tour europeo de rally histórico e para o Campionato de España de Rallys para Vehículos Históricos (CERVH), percorrerá os municipios de Betanzos, Irixoa, Vilarmaior, Monfero e Aranga.