Plans de finde: Ritos e lendas no Monte Pindo (Carnota)


Aproveitamos que esta fin de semana temos unha hora máis para apuntar na nosa axenda un plan de obrigado cumprimento.

Hoxe subimos ao Monte Pindo. Ao pé do pobo de O Pindo, un macizo duns 600 metros de altura cunha subida non moi doada e para a que ás veces é recomendable buscar a compañía dun guía local, ou incluso de asociacións que realizan rutas por este monte. 

O Monte Pindo non conta con camiños asfaltados. Hai que ir a pé ou nalgúns tramos tamén é posible en bicicleta. 

Lugares emblemáticos

O Monte Pindo tamén é chamado Olimpio Celta por obra de Manuel Murguía, que foi quen lle puxo este nome. 

Son catro os lugares importantes relacionados coa tradición aínda que ao longo de todo o espazo atoparemos rochas con formas curiosas como caras humanas, unha delas, O Coloso do Pindo, moi semellante a un soldado xigante. 

A primera parada podémola facer aos pés da Moa. Alí podemos visitar unha serie de muros sen data concreta e utilizados para construir torres de vixilancia para evitar a chegada dos normandos no século X. A Moa é o lugar onde segundo a tradición está soterrada a Raínha Lupa. 

Outra das paradas é o Campo da Moa, onde non hai moitas décadas facíase un ritual de curación nese chan. O ritual consistía en deitar á persoa enferma e cavar un círculo arredor. Cando a terra secaba dicíase que o enfermo estaba curado. 

A terceira das visitas é a base do Monte Penafiel, outro dos cumios. Alí hai unha inscrición en latín. Segundo conta unha lenda, a igrexa católica considera o lugar como pagano e excomulgado da súa bendición. 

E por último imos á Cova da Xoana, un lugar onde primaban os ritos para expulsar ao demo. Segundo a tradición aquí mantiñan as súas xuntanzas as meigas na noite de San Xoan. 

En resumo, estas son as catro paradas emblemáticas do Olimpo Celta, o Monte Pindo.