Policías Locais e Garda Civil coordinaranse para realizar controis conxuntos no Entroido

A Policía Local e a Garda Civil sumarán os seus esforzos, unha vez máis, e coordinaranse para levar a cabo diferentes dispositivos relacionados coa detección do consumo de bebidas alcohólicas e drogas en toda Galicia. Estes dispositivos vanse prolongar ata que terminen as festas de entroido por toda a comunidade, incrementando os servizos de vixilancia e control xa que hai un aumento dos desprazamentos con motivo desta festividade. Con celebracións en numerosas localidades de Galicia, ambos corpos policiais teñen como obxectivo garantir a seguridade viaria nesta época de festas de entroido. Por este motivo, traballarán conxuntamente para evitar tráxicos sucesos nos desprazamentos, prestando especial atención á velocidade e o consumo de alcol ou drogas. O obxectivo final é que durante este dispositivo especial de entroido non se produza ningún accidente mortal nas estradas e rúas de Galicia.