Este mércores presentouse o programa da edición número 40 do Festiletras, que terá lugar desde o xoves 1 de setembro ata o domingo 4 de setembro. Son catro días para festexar por todo o alto unha edición moi especial na que o festival cumpre 40 anos.
No programa pódese ver que van actuar artistas de todo tipo: Dios Ke Te Crew, Baiuca, Belém Tajes, Rosa Aneiros, Erica Esmorís, Quico Cadaval, Zënzar, María Canosa, Xabier Díaz & Adufeiras de Salitre ou as Pandereteiras do Roncudo.
O alcalde de Ponteceso, Lois García Carballido, agradece a participación das empresas e do voluntariado e resalta que “sen eles e sen a colaboración da Fundación Pondal, a Asociación Montebranco, o concello de Ponteceso, a Deputación da Coruña e a Xunta de Galicia, o festival non sería posible”.
Ademais, Carballido explicaba que o Festiletras coincide este sábado co Día da Provincia da Coruña, que se vai celebrar tamén en Ponteceso. O alcalde rematou a súa intervención animando a todos e todas a achegarse ata O Couto para gozar dunha cita tan importante para a cultura galega que se está volvendo imprescindible despois de tantos anos.