- Ás 10:00 horas Caxoto visitará ao alumnado de Ponteceso e ás 12:45 horas será recibido polos nenos e nenas de Corme
Con motivo da conmemoración do Día Internacional do Libro, que se celebrará o martes 23, a Concellaría de Educación, que dirixe Carlos Penedo Casmartiño, pretende achegar a literatura aos máis pequenos/as da casa coa posta en escena de dous espectáculos infantís protagonizados por Caxoto (Felipe Díaz) baixo o título “Contos vellos novos finais”. Será o mércores 24 da man da compañía A Trastenda dos contos.
Os contos, as cantigas, os xogos e o humor abordarán temas importantes relativos á igualdade e ao sexismo co obxectivo de rachar estereotipos de xénero e promover unha educación en valores desde a escola. Os primeiros en poder desfrutar desta iniciativa serán os alumnos do CEIP Eduardo Pondal de Ponteceso ás 10 da mañá e ás 12:45, será a quenda do alumnado do colexio de infantil e primaria As Forcadas de Corme.