- Os envases deberán depositarse no exterior das vivendas, en lugares visibles e accesibles
A Área de Medio Ambiente do Concello de Ponteceso volverá a poñer en marcha o servizo de reciclaxe e recollida a domicilio de aceite vexetal usado de cociña. A empresa Collecting Oil, encargada da retirada dos envases, iniciará este luns un novo percorrido por todo o municipio para recoller os máis de 2.000 botes de almacenaxe distribuídos entre a veciñanza.
Do 11 de maio ao 1 de xuño, persoal debidamente uniformado e en vehículos rotulados, procederá á retirada dos recipientes para baleirar. Os botes deben deixarse no exterior das vivendas, en lugares visibles e accesibles, para que os operarios poidan realizar o seu traballo con normalidade e sen dificultades. Desde o Concello de Ponteceso e desde a concesionaria agradecen de antemán a colaboración cidadá para garantir o correcto funcionamento do servizo, especialmente nestes momentos.
As persoas interesadas en obter máis información ou formar parte da campaña poden chamar ao teléfono 639 920 936.