Ana Pontón encabezou a delegación do BNG desprazada até Cee para manter unha reunión co comité de empresa da antiga Ferroatlántica (agora XEAL), despois de que Villar Mir pechara á venda ao fondo voitre norteamericano TPG.
A cuestión de urxencia: o ERTE en vigor e a caída en picado da actividade industrial das factorías tanto de Cee como Dumbría, o que pon na picota o futuro de 400 postos de traballo na comarca da Costa da Morte, ao tempo que a explotación das centrais hidroeléctricas está a pleno rendemento dando enormes beneficios ao novos accionistas.
“Estamos ante a repetición dunha farsa, case diría unha estafa: antes Villar Mir e agora un fondo de investimento desenvolven unha estratexia para desmantelar unha empresa que é fundamental para o tecido económico e social da comarca. Estamos ante unha fraude que consiste en explotar as centrais hidroeléctricas do Xallas e desmantelar o proceso industrial, empezando por poñer en marcha un ERTE”, denunciaba Pontón, tras mostrar o apoio do Bloque os traballadores e as traballadoras.
Ante esta situación, o BNG leva o asunto ao Parlamento con esixencias e propostas concretas de actuación a favor da comarca.
“Imos reclamarlle ao Goberno que solicite a retirada inmediata do ERTE, en segundo lugar que demande o reactivación da actividade industrial e do emprego, que faga cumprir as condicións da cesión da centrais hidroeléctricas, é dicir, investimentos para modernizar as plantas e mantemento dos postos de traballo. E, se o propietario das factorías non cumpre co establecido, o Goberno da Xunta debe iniciar un proceso de reversión á xestión pública das concesións das centrais hidroeléctricas, tendo en conta que están vinculadas ao mantemento da actividade industrial e do emprego e que non se cumpre”, demandou Pontón.
A líder nacionalista responsabiliza da situación ao presidente da Xunta por autorizar unha venda sen garantías. Indicou que a política industrial do xefe do Executivo na Costa da Morte “foi permitirlle a Villar Mir, -por certo empresario vinculado ao financiamento ilegal do PP-, que fixera caixa utilizando un ben público como son as centrais hidroeléctricas do Xallas e mirar para outro lado ante os incumprimentos do novo accionista”.