Tensión, pero sen pechar as portas ao diálogo na visita de Olaf Scholz a Moscova para buscar unha saída pacífica á crise ucraína. O chanceler alemán reuniuse no Kremlin co presidente ruso, Vladímir Putin, quen fixo moitos reproches a Occidente, aínda que asegura que non quere a guerra:
– «Querémola ou non? Por suposto que non. Precisamente por iso presentamos propostas para un proceso de negociacións», afirmaba o presidente ruso durante a rolda de prensa posterior á súa reunión con Scholz.
Putin reprocha a Occidente que non respondese positivamente ás súas esixencias de garantías de seguridade e acusou á OTAN de querer reforzar a súa á conta doutros países. O chanceler alemán insistiu pola súa banda na necesidade dunha rápida desescalada para evitar o peor dos escenarios. Scholz valorou positivamente a retirada dalgunhas unidades militares rusas da fronteira con Ucraína. Tamén o fixo o secretario xeral da OTAN, Jens Stoltenberg, aínda que engadiu que non hai probas de que Moscova vaia a retirar o groso das tropas que despregou na rexión.