A presidenta de Portos de Galicia, Susana Lenguas, amosou este martes ao patrón maior da confraría de Malpica, Pedro Pérez, a versión inicial do modelo dixital que reproduce o comportamento do fluxo da auga na zona da dársena malpicá. Esta ferramenta forma parte dos traballos que está a realizar o ente público dependente da Consellería do Mar no estudo da incidencia das ondas longas asociadas aos temporais na zona de entrada á dársena interior e no conxunto do peirao de Malpica co obxectivo de determinar cales son as actuacións máis axeitadas para mellorar a seguridade no acceso a este porto.
A reunión técnica deste martes, tras a que se realizou unha visita ao peirao, súmase a diferentes encontros mantidos nos últimos meses entre os técnicos de Portos de Galicia e a confraría de pescadores de Malpica de cara a verificar a procedencia das medidas adoptadas e outros aspectos necesarios para mellorar a seguridade no peirao malpicán.