O director do Centro de Investigación Forestal (CIF) de Lourizán, Enrique Martínez, destacou hoxe os avances na protección, conservación e mellora do patrimonio forestal de Galicia conseguidos no marco da estratexia investigadora da Axencia Galega da Calidade Alimentaria, dependente da Consellería do Medio Rural. En concreto, referiuse á situación actual e tendencias da investigación de fronte ao apoio á industria forestal no arranque das xornadas sobre innovación na cadea forestal-madeira de Galicia celebradas na Escola de Enxeñería Forestal da Universidade de Vigo (UVigo).
Primeiramente, Enrique Martínez fixo un repaso pola historia do CIF de Lourizán que o ano que vén cumprirá 80 anos de labor continuado con motivo de contribuír ao impulso do sector forestal, destacando que Galicia -como líder nacional e novena potencia forestal a nivel europeo- foi sempre pioneira en innovación e investigación forestal. Así, destacou que o traballo do Centro de Investigación Forestal está a axudar non só a reforzar a preparación fronte a ameazas como o nematodo do piñeiro ou a avespina do castiñeiro, senón tamén a recuperar as zonas afectadas polos grandes incendios deste verán, tras analizar a súa severidade e seleccionar as fórmulas idóneas de rexeneración.
Fai falta engadir que estas xornadas finalizarán con outra sesión o vindeiro luns, día 28, na que intervirá Gonzalo Piñeiro, técnico de I+D+i do CIS Madeira (Centro de Innovación e Servizos Tecnolóxicos da Madeira de Galicia), dentro da Axencia Galega da Industria Forestal, que falará sobre a situación actual e tendencias da innovación na industria da madeira.