EuroVelo é unha rede que atravesa 42 países ao longo de máis de 90.000 quilómetros. Unha das particularidades destas rutas é que poden ser utilizadas tanto por cicloturistas como polos habitantes locais que realizan os seus traxectos diarios.
Os obxectivos desta rede encaixan na promoción das viaxes sustentables, no impulso económico, ambiental e social dos territorios polos que transcorre e aposta pola promoción dun medio de transporte que repercute positivamente na saúde dos seus usuarios, xa que se logran hábitos de vida saudable e se empregan medios de transporte totalmente respectuosos co medio ambiente.
Galicia é a única rexión na que conflúen dúas rutas: a V1 e a V3. A V1 Ruta da costa atlántica, que remata en Fisterra despois de percorrer preto de 11.000 km. E a V3 a chamada Ruta dos peregrinos, que parte de Noruega para logo de 5.500 km chegar a Fisterra.
A presentación contou coa presenza do Presidente do Clúster Turismo de Galicia, Cesáreo Pardal, o Xerente oficina técnica centros BTT e EuroVelo Galicia, Agustín Hermida, a directora de Turismo de Galicia, Nava Castro, e o delegado da Xunta na Coruña, Gonzalo Trenor.