- O equipo redactor iniciará de inmediato o estudo das alegacións á espera dos informes sectorias da Xunta.
Rematados os dous meses do período de información pública, o Concello de Carballo recibiu 68 alegacións ao Plan especial de protección, infraestruturas e dotacións en Arnados-Razo. Aínda que está pendente de recibir os informes sectoriais que debe emitir a Administración autonómica, o equipo redactor comezará a estudar as alegacións de inmediato para que nun prazo aproximado de dous meses poidan convocarse “as comisións precisas para ditaminalas”, tal como indica a concelleira de Planificación, Milagros Lantes.
O Concello de Carballo primou a participación veciñal durante todo o proceso de elaboración do plan especial de Arnados e, nesa liña, xa en xaneiro, tras a aprobación inicial do documento, realizou o envío de notificacións individuais ós máis de 200 afectados ademais de facilitarlles un servizo de atención individual utilizado por 77 persoas.
O obxectivo deste Plan é a ordenación integral dunha superficie de 313.171 metros cadrados de solo rústico entre o núcleo de Razo da Costa e o monte Peados. A elaboración do documento foi laboriosa, xa que por unha banda ten que cumprir os obxectivos establecidos no Plan de Ordenación do Litoral (POL) para esa zona, preservar o medio ambiente, os espazos naturais e a paisaxe, e recuperar e protexer as áreas degradadas e os areais; mentres que, por outra, o plan debe prever as dotacións, infraestruturas e redes de servizos suficientes para o desenvolvemento dese ámbito. Nese sentido, delimítanse e ordénanse de xeito integral as zonas susceptibles de acoller usos propios de espazos libres, actividades deportivas, accesos ás praias ou aparcadoiros.
Paralelamente levouse a cabo o estudo de detalle da fachada litoral de Arnados, que xa está aprobado definitivamente.