Máis de 150 alegacións foron presentadas ante a Autoridade Portuaria da Coruña por veciños e diversas asociacións veciñais ao Proxecto de Ampliación de Actividade e prazo de Concesión de Repsol Petróleo na dársena do Porto Exterior de Langosteira.
Segundo a Plataforma en Defensa da Natureza e Calidade Ambiental – Arteixo, o proxecto incorre en graves deficiencias e incumprimentos das normativas vixentes, e non deixa claro se este inclúe, ademais da almacenamento, carga e descarga de produtos, outras actividades de produción ou transformación, cuxo desenvolvemento non está permitido dentro do marco da actividade portuaria.
Os veciños e visitantes habituais do Concello de Arteixo constatan, desde a creación da citada dársena, unha gran deterioración en praias, contornas naturais e fauna, así como un incremento moi considerable de contaminación acústica e tráfico pesado…
A isto hai que engadir tamén o preocupante empeoramento da calidade do aire, unha información que, segundo a Plataforma, o Concello de Arteixo se nega a publicar, a pesar de solicitalo veciños e algún partido da oposición.
Dado que o espazo que actualmente ocupa o Porto de Langosteira -nada menos de 6 millóns de m2 ocupa a instalación- foi
retraído do Patrimonio Público dos cidadáns para a realización de actividades económicas de entidades privadas, esixen que o
desenvolvemento do recinto portuario obedeza exclusivamente a proxectos compatibles coa contorna e a calidade de vida, e anuncian que serán moi belixerantes contra a implantación e o desenvolvemento de calquera proxecto que non responda a unha actividade portuaria tradicional.
Cabe lembrar, que o Porto Exterior creouse como Porto Refuxio a raíz do sinistro do Prestige. Posteriormente, expúxose o traslado dos depósitos de Repsol e a liberación de espazos portuarios na dársena da capital coruñesa. E, finalmente, co obxectivo prioritario de reducir a débeda da entidade portuaria, a esta institución ocorréuselle transformar o Porto Exterior arteixano nun Macro Polígono Industrial de xeito evidente fraudulento de Lei.
O sentir dos veciños e asociacións é o que foron enganados reiteradamente, quedando indefensos para poder realizar alegacións e mostrar o seu rexeitamento ao uso dun Dominio Publico de altísimo valor natural e cultural, para dar paso a un Polígono Industrial Costeiro que xa deteriorou
irreversiblemente o medio ambiente, e que derivará aínda máis nun verdadeiro desastre para toda a comarca.
Segundo prosegue a Plataforma, neste caso concreto – Ampliación Actividade Repsol – incúmprense as seguintes normativas, entre outras:
- Non consta a obrigada avaliación ambiental.- Lei 21/2013
- Modificación substancial da Concesión actual. Leis Portos 82.2 e 88.2
- Non garante a Protección do medio ambiente – Art.45 Constitución
- Non garante a Protección da Saúde Humana – Lei 33/2011
- Falta de Exposición Pública real e efectiva – Lei 39/2015 e outras
- Inexistencia de Proxecto Público
- Vulneración do Dereito de Participación Pública.
PDNC Arteixo, como Plataforma que coordina a acción dos colectivos antes mencionados, levará a cabo accións para esixir que os dereitos de Participación Pública sexan respectados, e que sexan os cidadáns os que teñan unha maior capacidade de decisión no desenvolvemento das accións, superficies e actividades que se van a realizar na Franxa Costeira subtraída e posta ao servizo de intereses privados.