- A dispoñibilidade deste equipamento reducirá o orzamento do novo contrato deste servizo
O municipio da Laracha xa conta cun novo punto limpo móbil, o cal foi adquirido polo Concello coa colaboración da Consellería de Medio Ambiente, Territorio e Vivenda. Á presentación do mesmo acudiron o rexedor da Laracha, José Manuel López Varela; o delegado da Xunta de Galicia na provincia da Coruña, Gonzalo Trenor; e os edís José Ramón Martínez e Rocío López.
O vehículo, valorado en máis de 58.000 euros, presenta un consumo eficiente ao contar cos límites de emisión de dióxido de carbono máis baixos do mercado. Grazas a este equipamento mellorarase o servizo de recollida a domicilio de residuos especiais (voluminosos e perigosos).
Nos vindeiros días o Concello sacará á licitación os novos contratos de limpeza viaria e tamén da xestión do punto limpo e do servizo de recollida de voluminosos. A dispoñibilidade do camión de carga de titularidade municipal e a súa posta á disposición da empresa que resulte adxudicataria estará contemplada nos pregos, o que permitirá reducir o orzamento deste servizo.