A Mostra Primavera en Danza de Carballo celebrará a súa décimo sétima edición do 26 de abril ao 12 de maio cunha carteleira que inclúe cinco citas coreográficas programadas a través da Rede Galega de Teatros e Auditorios, o circuíto de espectáculos que a Consellería de Cultura e Turismo promove a través da Axencia Galega das Industrias Culturais (Agadic) en colaboración coas entidades xestoras dos seus 40 espazos asociados.
Un deles é o Pazo da Cultura carballés, onde terán lugar as devanditas actuacións: Entresoños, de Fran Sieira (26 de abril); Pink Unicorns, de La Macana en coprodución co Centro Coreográfico Galego (27 de abril); Plastic, de Paula Quintas (3 de maio); La desnudez, de Daniel Abreu (4 de maio), e Gaia, de Entremans (5 de maio). Como peche especial, o 12 de maio terá lugar unha gala de baile tradicional a cargo da agrupación coruñesa Xacarandaina, que está a celebrar os seus corenta anos de historia.
O programa da Mostra Primavera en Danza, que inclúe tamén diferentes actividades complementarias de achegamento á danza contemporánea, foi detallado este mércores na presentación na que participou o director da Agadic, Jacobo Sutil, xunto ao alcalde de Carballo, Evencio Ferrero; o concelleiro de Cultura e Deporte, Marcos Trigo, e os representantes dalgunhas das compañías en cartel.
Producións galegas
Na súa intervención, o responsable da Agadic situou esta iniciativa do Pazo da Cultura entre os programas pioneiros en Galicia á hora de fidelizar un público para a danza, ademais de destacar o seu valor de promoción para os artistas e compañías que se dedican a esta disciplina na nosa Comunidade. Neste sentido, subliñou a calidade dos catro espectáculos de produción galega contratados para a mostra a través do catálogo da Rede Galega de Teatros e Auditorios: Entresoños, Pink Unicorns, Plastic e Gaia.
Ademais, referiuse especificamente á segunda destas montaxes, presentada por La Macana e coproducida pola Agadic a través do Centro Coreográfico Galego, para incidir no elevado nivel e na diversidade do traballo que se está a facer dentro deste ámbito escénico: “Trátase dunha aposta novidosa, nacida en Galicia, pero con participación internacional e apoiada, ademais, por dúas importantes estruturas escénicas de Alemaña”, afirmou.
Marcos Trigo salientou a traxectoria “dun programa que avala una cita cultural única en Galicia pola súa estabilidade e porque ofrece unha ampla perspectiva de calidade de danza contemporánea e de propostas moi significativas a nivel nacional”. “Neste momento”, engadiu, “Primavera en danza” é un dos escasísimos ciclos estables de danza contemporánea e dos más duradeiros en Galicia, altamente recomendable a todos os interesados en estar ao día nas propostas artísticas relacionadas co mundo audiovisual, a imaxe, a música e o movemento”.
“A programación cultural deste concello”, afirmou o alcalde, “intenta ser unha programación que reflicta a realidade artística pero tendo en conta tamén as vangardas. Queremos que se vexa con toda naturalidade que en un concello como Carballo pode haber toda a diversidade artística, e por suposto a danza”. “Aquí”, engadiu, “hai eventos que teñen un recoñecidísimo prestixio en todo o país a nivel de teatro, a nivel de música, a nivel de todas as formas de comunicación de contidos dixitais, e a danza forma tamén parte das artes que se merecen gozar e contemplar”.
