A titular do Xulgado de instrución número 2 de Santiago de Compostela decretou este martes o ingreso en prisión provisional e sen fianza do mozo de 25 anos detido por acoitelar supostamente o seu pai nun local de copas nas aforas de Santiago de Compostela. O mozo está investigado por un suposto delito de homicidio en grao de tentativa. Os feitos tiveron lugar entre as 05.00 e as 06.00 horas deste luns no local Pub A Casa, situado en San Marcos, onde o mozo foi detido como presunto autor dunha agresión con arma branca ao seu pai, que foi evacuado ao Hospital Clínico da capital galega. Fontes próximas á investigación aseguraron que a arma foi intervida e que o mozo recoñeceu os feitos. Así mesmo, confirmaron que hai unha testemuña do ocorrido. O home agredido segue hospitalizado, aínda que a súa vida non corre perigo.