- O mercado do sábado trasládase ao Campo da Feira, polo que tampouco se poderá estacionar das 07:00 ás 14:00 horas
Este venres é o primeiro dos catro días de celebración que acollerá a vila de Ponteceso aproveitando a ponte do Pilar. A empresa LB Producciones organizou, co apoio do Concello, a primeira Festa en apoio á verbena galega para «axudar a reactivar a verbena, o comercio e a hostelería local», destacou a empresa nun comunicado despois da polémica xerada coa presentación do cartel ao dar por sentado que detrás deste evento se atopaba a comisión de festas da Pilarica. Ademais, outro dos puntos quentes é o apoio da Administración local, algo que a oposición non comprende posto que o alcalde, Lois García Carballido, «hai un mes estaba aplaudindo á Comisión da Barquiña por non organizar ningún evento».
Ante as actuacións previstas, desde o goberno local comunican que o aparcamento quedará prohibido do 9 ao 12 nas catro rúas adxacentes á praza do Campo da Feira, lugar no que «tampouco se poderá estacionar das 07:00 ás 14:00 horas ao acoller o mercado o sábado». Tamén haberá limitacións ao tráfico en «dúas das rúas que dan acceso rodado á praza durante os concertos nocturnos do sábado e do luns».
Desde LB Producciones aseguran que non baixarán a garda con respecto ao cumprimento das normas sanitarias. O botellón estará prohibido.
