A colaboración entre o Concello e as panadarías continúa esta Semana Santa coa promoción do bolo de Pascua. Fortalecer a marca Panadarías de Carballo, incrementar a proxección do pan e doutros produtos coma as empanadas ou o pan de ovo máis alá da nosa contorna, ademais de poñelos en valor como un recurso gastronómico e turístico, é o obxectivo das campañas que se desenvolven nos últimos meses coa colaboración de todas as empresas do sector radicadas no concello. Esta Semana Santa é o turno do bolo de Pascua, un produto moi carballés que tradicionalmente agasallan as madriñas e os padriños aos seus afillados e afilladas o domingo de Pascua. Para exemplificar esa tradición volverase a utilizar o lema Carballo levámolo dentro, con caixas personalizadas para tortas e doces, incluídas as roscas de Pascua. En total repartiranse 1.500 caixas entre todas as panadarías do concello.
45