- O regulamento de honores non contempla esta opción, polo que será necesario modificalo
O goberno local de Muxía proporá a medalla ao mérito aos voluntarios de Protección Civil e membros da Policía Local da localidade modificando o actual regulamento de honores, que non contempla actualmente esta opción.
Así, iniciaranse os trámites para a creación “dun distintivo para a súa concesión a determinadas persoas ou entidades que realicen actuacións ou intervencións de interés para Muxía non contempladas ata o momento neste regulamento”, sinala o alcalde, Iago Toba, quen engade que “moitas veces só con palabras non é suficiente».
Cabe destacar que tanto Policía Local como Protección Civil desenvolveron tarefas “indispensables” para a seguridade da veciñanza durante o estado de alarma, ademais de supoñer un indispensable “apoio para moitas persoas nun contexto tremendamente complicado”, inciden desde o goberno local.