Miles de manifestantes marcharon polas rúas de Múnic este sábado para esixir aos líderes do G7 máis accións para paliar o cambio climático. A protesta ocorre un día antes da reunión dos líderes do grupo no castelo de Elmau, que comeza este domingo e finalizará o martes. Nun vídeo, o chanceler alemán, Olaf Scholz, expresou a súa esperanza de que os líderes sexan capaces de tomar «decisións importantes». Varios grupos ecoloxistas como WWF ou Greenpeace, estiveron presentes na manifestación. Entre as esixencias dos manifestantes están a eliminación dos combustibles fósiles, a preservación da diversidade animal e vexetal, a xustiza social no planeta e a intensificación da loita contra a fame. Varios incidentes entre a policía e un pequeno grupo de manifestantes autodenominados «bloque anticapitalista» salpicaron a protesta en Múnic. Durante estes días, están previstas outras protestas contra o cume.