PSOE e Unidas Podemos acordaron este mércores un documento conxunto con propostas para a recentemente creada Comisión parlamentaria para a Reconstrución social e económica de España no que non concretan a creación dun novo imposto que grave as grandes fortunas, como querían os de Pablo Iglesias.
Ambos grupos si apostan por subir os impostos para asimilar a carga fiscal en España á media dos países da UE, aínda que evitan concretar cales no seu acordo, que agora compartirán co resto de formacións políticas en aras de buscar un consenso máis amplo. E é que será a citada Comisión da Reconstrución a encargada de aprobar o documento definitivo que pode servir de base para a elaboración duns próximos Orzamentos Xerais do Estado, ao fixar xa unha serie de políticas prioritarias nas que centrar os recursos.
PSOE e Unidas Podemos acordaron a necesidade de garantir a atención sanitaria da terceira idade nas residencias, mediante a coordinación dos sistemas sanitario e social, así como desenvolver un sistema de «inspección periódica» que permita comprobar que estes centros cumpren as condicións esixidas.
Piden que nas residencias, o seguimento da atención sanitaria se realice polo centro de saúde con derivación a hospital cando a situación clínica o requira, e que se establezan protocolos de atención en situacións terminais e de coidados paliativos asimilados aos domiciliarios.