O Ministerio de Agricultura, Pesca e Alimentación establece os criterios de concesión de 357,7 millóns de euros en axudas directas extraordinarias aos sectores agrícolas máis afectados polas consecuencias do segundo ano de seca e polo incremento dos custos de produción pola guerra en Ucraína.
A orde ministerial publicada este mércores no Boletín Oficial do Estado, unha vez concluído o procedemento de consulta ás comunidades autónomas e o sector, fixa as condicións, así como os importes das axudas en función das zonas e do nivel de afectación da seca nas mesmas.
Destes 357,7 millóns de euros, para mitigar a situación dos agricultores con superficies de cultivos herbáceos de secaño e de determinados cultivos industriais (tomate de industria e arroz) destinaranse 268,7 millóns de euros. Outros 8 millóns de euros irán aos produtores da cereixa do Val do Jerte (Cáceres). Mentres que os 81 millóns de euros procedentes da reserva agrícola -concedidos a España pola Comisión Europea- irán aos produtores de determinados cultivos leñosos (froiteiros de pebida, de óso, tropicais, cítricos e froitos de casca).